Beej ós vertrek naor Nijmegen waas ut lekker werm. Op ut station in Venlo stond nog unne gek met un scheemerlamp in de hand dae gaer met ós meij woel gaon. Dae hebbe we vrintelik weggesteurd. In Nijmegen aangekómme had Cees naeve ut station ut hotel Mercure gereserveerd. In de hotelbar hebbe we de ierste glaaze baer gedrónke. We maakte kennis met ut baermerk de Hemel. Det waas un bietje bitter en daorum hebbe we ut vaerder euveral laote staon. Toen zien we begónne met de stadswandeling. We hebbe de stadsmoore gezeen met de kruidtoren. In de straot de Lange Hezel kiek se de auge óet naor alde gevels en leuke winkels. We zien gekómme wies de Commanderie van St. Jan. Un geweldige binnenplaats um röstig te zitte en um te high teaje. Laot door auk de brouwerie de Hemel zitte waor ze gen ander pils hebbe. Zien we maar waer snel vertrokke. Ut ierste terras waas beej van Buren. Daor hebbe nog effe stil gestaon beej ózze euverleeje naamgenoot. We kreege hónger en zóchte ut allerbelabberste cafetaria op met un boetelandse bezetting. Cees kreeg un werm ieske det van ut stekske aafveel. Nao un zelftes van de eigenaer kreeg hae un nie det wal bevroore waas. Maar zelfs van det aete geit de hónger euver. We hebbe de ganse aovend gezaete beej kefee de Deut. We hebbe door mótte lache met Jac. Dae kós un typetje naodoon van unne bekinde Venlonaer. Daornao woorte we vervaelend luidruchtig veur de minse die door zoote. Op eur verzeuk is Huub gestop met ut zinge euver Lei ziene prei.
Op de zaoterdaag leepe we naor un kefee beej de mert. Daor waas un podium veur ut Samba treffe in de stad. Det hebbe we geweite. Vanaaf ut moment dat die 15 bands begóste te speule hebbe we gen woord mier met elkaar gespraoke. Waas de eine band weg kwaam de volgende. Waor se auk kwaams in de stad kwaam se "de dieke schiem" taege. Um det te ontvluchte zien we naor un kefee gelaupe naeve van Buren. Terwiel de andere minse in de zón zoote te geneete zoote weej in un hukske met de jas aan. Gelökkig leep der un filmster te bedeene beej kefee de grote Griet in un kort roeëd kledje wat ós ald blood deej opwerme. S 'aoves zien we naor un gezellig kefee op de mert gelaupe woor we binne kóste aete. Onder de noemer eenvoudig en neet deur waas ut toch nog lekker. Mier meuijte hadde we met de eenvoudige wc die ze door hadde met un vals trepke naor ónder. Ze hadde in idder geval unne lekkere pils. Reeje genóg um te blieve hange.
Op de zondaag ginge we de stadswandeling aafmaake. Cees volgde un eigen route naor de Valkhof. Det is un ruïne op unne berg. Ut beejbehurende museum euver de Romeinse tièd, woor iddere toeris naor geit kieke, hebbe we maar euver geslaage. Dan maar naor ut fietsmuseum onder aan de Waalkade. Waer gen interesse. Ut waas inmiddels 12.00 oor gewaore. De meiste van ós stónde druuëg en ut lichaam schrieuwde um baer. Det kreege we op un terras aan de Waalkade. Ut casino waas vlak beej. Kós se binne gaon kieke. Meus se de jas óet doon, dich legitimaire en € 5,00 betaale. Hebbe we auk neet gedaon. Boete zoote we vol in de wind. Naor ein glaas baer waare we door al waer weg. Waer de binnenstad in. De trommelaers bleeve ós achtervolge. Zien we maar waer naor ut hotel gelaupe en hebbe de trein truuk gepak naor Venlo.