Ut jubileumreisje van de Wannevleegers woort veurbereid door ut reiscommité Nol, Martin, Ves en Wil. Veur den tièd hadde ze niks van de bestumming losgelaote. We stonden op vriedaag 14 september 2012 um 14.00 oor op ut station in Venlo. We kreege kaertjes veur Maastreech. Door aangekomme meuste we met twieë busjes naor ut gehuch "Ut Gashoes" op de Bemelerberg. Door stond vaerder niks dan un paar huus en un scheur die als Bed & Breakfast "Le passe partout" verhuurd woort. We kreege te huure dat der un activiteiten weekend geplend waas in plaats van de normale stedentrip. Det waas de nieje trend veur de groepsbinding, auk beej bedrieve. De einig zichtbare activiteit waas aan de euverkant ut kefee-restaurant "Café ut Plateau" veur ut drinke en de werme hap. Bleek al flot dat der gen restaurant mier waas nao un verandering van eigenaar. Als ierste groepsactiviteit hebbe we Peter van ut café geholpe met geld veur zien aanlaup problemen. Un kleine verbouwing waas heej meij meugelik. Ut aete bestond dae vriedaag óet friet die se gehaold hebbe beej de camping in de buurt. Ut commité probeerde ós um 23.00 naor bed te kriege. Vanwaege ut groepsbelang hebbe weej det neet gedaon.
Op de zaoterdaag stonde um 9.00 oor te taofels gedek en waas John eier met spek aan ut bakke. Die twieë (Jac en Jan) die in Helden ut ontbijt mis waare gelaupe zoote als ierste. Nao ut ontbijt meuste we de mekkelikke schoon aan doon. Der waas un wandelroute gevonde van 7 km. Ut woorte wal 17 km. Det waas auk nog ens laevens geveurlik. Det kwaam door die ± 8.000 maffe wielrenners die de alternatieve WK route aan ut fietse waare. De meus de ganse tièd in de géut springe naeve de waeg om die fietsers en auto's te laote passeere. Eindelik van de drökke waeg aaf ging ut met de wandelroute al direk mis. De route klopte neet volgens Frans, dae nog wal beej de scouting waas gewaes. Benkskes en klaphekke die we volges de pepaere taegen meuste kómme waare verdweene. Waor we bergop meuste ginge we bergaaf. We zien toch maar vaerder gelaupe. Kwaame we (nao un onzichbaar bord waorop "einde weg" zoel hebbe gestaon.) óet op de binnenplaats van un boerderie. Door loog unne gruwelikke waakhond (meutje monster) aan 2 maeter ketting. Dóchte weej. Ut waare 8 maeter wies aan de ueverkant van de paad. Nao Frans,dae rende veur zien laeve, dors der neemes mier veurbeej. Frans is door de wei euver de pindraod mótte klumme um vaerder te kinne. We meuste dan un huuëgte wie de Cauberg oplaupe um in Berg en Terblijt aan te kómme. Toen waare weej en zeker Ton en John kompleet óetgedruuëg. Volgens de inwoeëners van ut dörp kóste we naor restaurant "ut Vöske" in ut dörp. Maar ut commité wis ut baeter. We meuste nog vaerder laupe naor un soort kiepehok met de naam "Herberg den bonte Haan" woor se beer en un onduudelikke soep kós kriege. Aangesterk lökde ut Ton en John auk det kleine stökske naor ut Gashoes truuk te laupe. Peter van de euverkant stond al aan de raam te kieke waor we bleeve. Dieke pech veur um dat weej de res van de verbouwing neet mier deeje sponsere. We ginge zelf saame un 6 gangen dinee klaor maake. Det waas un behuurlikke klus onder begeleiding van inkele cuisiniers. Door zien we toch oore meij beezig gewaes. Ut mót gezag waere dat we der allemaol mier of minder aan meijgewerk hebbe. Ut leukste gedeilte waas toch ut opaete. Onder ut genot van 5 flesse roeje wien van 1 1/2 lieter die eine kluns al direk allemaol aope had gedreid. Det haet ós de ganse aovend gekós um det allemaol op te kriege. Toen die op waare lökde ut Jac auk nog um de tekorte aan te völle. Hae kós daeze aovend nog van water en un teezekske roeje wien maake.
Op de zondaag meus John tovere (vanwaege un tekort aan eier) um veur idderein un gebakke ei klaor te maake. Dan waas ut tièd um in te pakke en um te kieke of we de boel neet verneeld hadde. Gelökkig waas det neet en kreege we de borg truuk. Boete hebbe we nog vliegtuige gespot die in Baek de lucht in ginge. We zien toen waer netjes door de buskes naor Mestreech truuk gebrach. Beej "Hotel de Posthoorn" hebbe we nog (veur sommige te kort) op ut terras gezaete tot de trein waer truuk reed naor Venlo.
Reiscommité bedank veur ut vuuële veurwerk en de begeleiding op die daag. De tóekoms zal óetwiese of de groepsgesprekke un gróttere umzet beej Herman als gevolg hebbe. Ut is achteraaf gezeen wal un gemis dat Herman en Piet neet beej de groepsgesprekke aanwezig waare.